‘டாக்ஸிக்’ படத்தின் ‘தபாஹி’  மியூசிக் வீடியோ வெளியீடு

Monster Mind Creations, KVN Productions மற்றும் Zee Music Company இணைந்து தயாரித்துள்ள ‘டாக்ஸிக்: எ ஃபேரி டேல் ஃபார் க்ரோன்-அப்ஸ்’ (Toxic: A Fairy Tale for Grown-Ups) திரைப்படத்தின் முதல் பாடலான ‘தபாஹி’-யின் அதிகாரப்பூர்வ மியூசிக் வீடியோ வெளியாகியுள்ளது. ஏற்கனவே ஆடியோ வடிவில் வெளியாகி ரசிகர்களிடம் அமோக வரவேற்பைப் பெற்ற இந்தப் பாடல்,  ரசிகர்களை மீண்டும் கவர்ந்துள்ளது.

ரசிகர்கள் ஆவலுடன் எதிர்பார்த்திருந்த இந்த மியூசிக் வீடியோ, திரைப்படத்தின் அதிகாரப்பூர்வ இசை கூட்டாளரான Zee Music Company உடன் இணைந்து வெளியிடப்பட்டுள்ளது. இந்திய சினிமாவின் மிகவும் எதிர்பார்க்கப்படும் திரைப்படங்களில் ஒன்றாகக் கருதப்படும் ‘டாக்ஸிக்’ திரைப்படத்தின் தனித்துவமான உலகை முதன்முறையாக ரசிகர்கள் காணும் வாய்ப்பையும் இந்த வீடியோ வழங்குகிறது.

யாஷ் மற்றும் கியாரா அத்வானி முதல் முறையாக இணைந்து திரையில் தோன்றும் இந்தப் பாடல், இருவருக்கும் இடையேயான அழகிய காதல் ரசாயனத்தையும், உணர்வுபூர்வமான நடிப்பையும் வெளிப்படுத்துகிறது. அவர்களைச் சுற்றிய உலகமே மறைந்து போகும் அளவிற்கு ஆழமான காதலை சித்தரிக்கும் இந்தப் பாடல், கண்கவர் ஒளிப்பதிவு, உணர்வுகளைத் தூண்டும் கதை சொல்லல், மின்னல் வேக கிட்டார் இசை மற்றும் உயர்தர ஆர்கெஸ்ட்ரா இசையுடன், திரைப்படத்தின் மர்மமான உலகிற்கு சிறப்பான அறிமுகமாக அமைந்துள்ளது.

மியூசிக் வீடியோ வெளியீட்டிற்கு முன்னதாக, ஜூலை 7-ஆம் தேதி தயாரிப்பாளர்கள் சமூக வலைதளங்களில் ரசிகர்களிடையே சுவாரஸ்யமான எதிர்பார்ப்பை ஏற்படுத்தினர். திரைப்படத்தின் அதிகாரப்பூர்வ பக்கத்தில், “திருடப்பட்ட சில தருணங்களில் மட்டுமே வாழும் தடைசெய்யப்பட்ட காதலை என்னவென்று அழைப்பீர்கள்?” என்ற கேள்வி எழுப்பப்பட்டு, அதில் கியாரா அத்வானி குறிப்பிடப்பட்டிருந்தார். அதற்கு அவர் ஒரே வார்த்தையில் “தபாஹி” என்று பதிலளித்தார். அதைத் தொடர்ந்து Zee Music Company தனது சமூக வலைதளப் பதிவில் “Stay Tuned…” என குறிப்பிட்டது. இந்த சமூக வலைதள பரிமாற்றம் ரசிகர்களிடையே பெரும் ஆர்வத்தை ஏற்படுத்தியது.

இசையமைப்பாளரும் பாடகருமான விஷால் மிஸ்ரா இசையமைத்து பாடியுள்ள இந்தப் பாடலின் இந்தி வரிகளை ராஜ் சேகர் எழுதியுள்ளார். இந்தி, கன்னடம், தெலுங்கு, தமிழ் மற்றும் மலையாளம் ஆகிய மொழிகளில் வெளியிடப்பட்டுள்ள இந்தப் பாடலுக்கு, கன்னடத்தில் யோகராஜ் பட், தெலுங்கில் ராமஜோகைய்யா சாஸ்திரி, தமிழில் விக்னேஷ் சிவன், மலையாளத்தில் ரஃபீக் அகமது ஆகியோர் வரிகளை எழுதியுள்ளனர். இது திரைப்படத்தின் உண்மையான பான்-இந்திய தன்மையை பிரதிபலிக்கிறது.

பாடல் குறித்து இசையமைப்பாளர் விஷால் மிஸ்ரா கூறுகையில், “‘தபாஹி’ என்பது சாதாரண காதல் பாடல் அல்ல. முழுமையான சரணாகதியையும், கட்டுப்படுத்த முடியாத தீவிரமான காதலையும் வெளிப்படுத்தும் இசை இது. யாஷ் திரையில் வெளிப்படுத்தும் தீவிரத்தை இசையின் ஒவ்வொரு ஸ்வரத்திலும் பதிவு செய்ய முயன்றேன். இந்தப் பாடல், காதலின் வடிகட்டப்படாத உணர்வுகளுக்கான இசைப் பயணமாக இருக்கும்” என்றார்.

இந்த திரைப்படத்தில் யாஷ், நயன்தாரா, கியாரா அத்வானி, தாரா சுதாரியா, ருக்மிணி வசந்த் மற்றும் ஹுமா குரேஷி உள்ளிட்ட முன்னணி நட்சத்திரங்கள் நடித்துள்ளனர்.

யாஷ் மற்றும் கீது மோகன்தாஸ் இணைந்து கதை எழுதியுள்ள இந்தப் படத்தை கீது மோகன்தாஸ் இயக்கியுள்ளார். கன்னடம் மற்றும் ஆங்கிலத்தில் உருவாகியுள்ள இப்படம், இந்தி, தமிழ், தெலுங்கு, மலையாளம் உள்ளிட்ட பல மொழிகளில் வெளியாகவுள்ளது.

KVN Productions மற்றும் Monster Mind Creations தயாரித்துள்ள ‘டாக்ஸிக்: எ ஃபேரி டேல் ஃபார் க்ரோன்-அப்ஸ்’, 2026 ஆகஸ்ட் 26-ஆம் தேதி உலகம் முழுவதும் திரையரங்குகளில் வெளியாகிறது.