இயக்குனர் பிரதீப்-சிபிராஜ் கூட்டணியில் இணையும் நந்திதா ஸ்வேதா

15

தமிழ், தெலுங்கு மற்றும் கன்னட மொழிப்படங்களில் பிஸியாக நடித்துக் கொண்டிருக்கும் நடிகை நந்திதா ஸ்வேதா, சிபிராஜ், நாசர், சம்பத் நடிக்கும் பெயரிடப்படாத படத்தில் முக்கிய பாத்திரத்தில் நடிக்கிறார்.

இப்படத்தை ‘சைத்தான்’, ‘சத்யா’ புகழ் இயக்குநர் பிரதீப் கிருஷ்ணமூர்த்தி இயக்குகிறார்.

கிரியேட்டிவ் என்டர்டெய்னர்ஸ் மற்றும் விநியோகஸ்தர்களின் டாக்டர் ஜி.தனஞ்சயன் மற்றும் லலிதா தனஞ்சயன் ஆகியோர் இந்த சஸ்பென்ஸ்-த்ரில்லர் படத்தைத் தயாரிக்கிறார்கள்.

இந்த படத்தில் நந்திதா ஸ்வேதா நடிக்க ஒப்பந்தமானதைக் குறித்து பேசிய கிரியேட்டிவ் என்டர்டெய்னர்ஸ் அண்ட் டிஸ்ட்ரிபியூட்டர்ஸ் தயாரிப்பாளர் ஜி தனஞ்சயன்,

“இந்த படத்தில் நந்திதா ஸ்வேதா கதாநாயகியாக நடிக்கவுள்ளதாக அறிவிப்பதில் நாங்கள் மகிழ்ச்சியடைகிறோம்.

தனக்கு கொடுக்கப்பட்ட பாத்திரங்களைப் புரிந்துக் கொண்டு அதற்கேற்ப பன்முகத் திறமையை வெளிப்படுத்தி, அனைவரிடமும் பாராட்டுக்களை குவிப்பதில் வல்லவர்.

அவரது ஈடுபாடு இப்படத்திற்கு கூடுதல் வலுசேர்க்கும் என்று நான் உறுதியாக நம்புகிறேன். நானும், இயக்குனர் பிரதீப் கிருஷ்ணமூர்த்தி நடிகைகளின் பட்டியலை வைத்துக் கொண்டு, நந்திதா ஸ்வேதாதான் சரியான தேர்வாக இருப்பார் என்று உணர்ந்தோம்.

இயக்குனர் பிரதீப் மற்றும் சிபிராஜ் ஆகியோரின் சமீபத்திய வெற்றி பெற்ற படமான ‘சத்யா’ படத்திற்குப் பிறகு இப்படத்தில் ஒன்றாக இணைகிறார்கள்.

இப்படத்தில் நாசர், சம்பத் மற்றும் பலர் முக்கிய வேடங்களில் நடிக்கிறார்கள்.

சைமன் கே கிங்கின் இசையும், ஜான் மகேந்திரனின் வசனங்களும் ஏற்கனவே இந்த படத்திற்கு கூடுதல் தூணாக மாறிவிட்டன.

இந்த படத்தின் படப்பிடிப்பு 2019 நவம்பரில் தொடங்கி 2020 ஜனவரியில் ஒரே கட்டமாக நடத்தி முடிக்கப்படும், அதைத் தொடர்ந்து உலகளாவிய திரையரங்கில் மார்ச் 2020 இல் வெளியிடப்படும்.