சேரன் திருந்த வேண்டும், இல்லையேல் நடவடிக்கை…. – விஷால் எச்சரிக்கை

cheran1

ஆர்.கே.நகர் இடைத்தேர்தலில் விஷால் சுயேட்சையாக போட்டியிடுகிறார்.

இதற்கு தயாரிப்பாளர்கள் மத்தியில் கடும் எதிர்ப்பு ஏற்பட்டுள்ளது.

விஷாலின் நடவடிக்கையினால் தயாரிப்பாளர்களுக்கு பாதிப்பு ஏற்படும் என்பதால் அவரை பதவி விலகச் சொல்லி, தயாரிப்பாளர் சங்கத்தில் உள்ளிருப்புப்போராட்டம் தொடங்கினார் இயக்குநரும் தயாரிப்பாளருமான சேரன்.

அவருக்கு ஆதரவாக, விஷாலின் எதிரிகள் ஒருங்கிணைக்கப்பட்டு வருகின்றனர்.

ஏற்கனவே விஷால் மீது தயாரிப்பாளர்களுக்கு கடும் அதிருப்தி நிலவுகிறது. இந்நிலையில் எதிரிகளின் எண்ணிக்கை அதிகமானால் தன்னுடைய பதவிக்கு ஆபத்து ஏற்பட்டுள்ளதை உணர்ந்து ஒரு அறிக்கை வெளியிட்டுள்ளார் விஷால்.

“இயக்குநர் சேரன் அவர்கள் மீது நான் மதிப்பும் மரியாதையும் வைத்திருக்கிறேன். ஆனால் சமீபகாலமாக அவர் செய்யும் தரக்குறைவான விளம்பரங்கள் அவர் மீது பரிதாபத்தைத்தான் ஏற்படுத்துகின்றன.

ஒரு சங்கத்தின் பொறுப்பில் இருப்பவர் தேர்தலில் நிற்கக்கூடாது என்று எந்த சட்டவிதியும் இல்லை.

இது எனது தனிப்பட்ட முடிவு.

சேரனின் வாதத்தை ஏற்றுக்கொள்ளவே முடியாது.

நான் தேர்தலில் போட்டியிடுவதாலேயே அரசாங்கம் தயாரிப்பாளர் சங்கத்தை பழி வாங்கும் என்பது ஜனநாயகத்துக்கே எதிரான குற்றச்சாட்டாகத்தான் பார்க்கிறேன்.

சேரனின் வாதம் இன்றைய மற்றும் முன்னாள் அரசுகளையும், முன்னாள் சங்க நிர்வாகிகளையும் கொச்சைப்படுத்துவது போல் இருக்கிறது.

எப்போதுமே உரிமைகள் என்பவை கெஞ்சிக் கேட்டு பெற வேண்டியவை அல்ல.

அவை குரல் எழுப்பி பெற வேண்டியவை என்று நம்புகிறவன் நான்.

அதன்படி தான் செயல்படுகிறேன்.

ஆர்கே நகர் தேர்தலில் போட்டியிடுவதும் அப்படி மக்களின் சார்பில் அவர்களுக்காக குரல் எழுப்பத்தான்.

என்னுடைய நண்பர்களையும் சட்ட நிபுணர்களையும் கலந்தாலோசித்த பின்னரே இந்த முடிவை எடுத்தேன்.

எதுவாக இருந்தாலும் சட்டப்படி சந்திக்கத் தயாராக இருக்கிறேன்.

அதைவிடுத்து கீழ்த்தரமான விமர்சனங்களை வைத்து மிரட்டி காரியம் சாதிக்கவோ விளம்பரம் தேடவோ முயற்சிக்கும் எந்த ஒரு செயலையும் சங்கத்தில் அனுமதிக்கவே முடியாது.
இனிமேலாவது சேரன் திருந்தி வீண் விளம்பரங்கள் தேடுவதை விட்டுவிட்டு ஆரோக்யமான மனோபாவத்துக்கு மாற வேண்டும்.

சேரனின் செயல்கள் தொடர்ந்தால் சங்க விதிகள்படி அவர்மீது சட்டபடி நடவடிக்கை எடுக்கப்படும்.”

என்று விஷால் வெளியிட்டுள்ள அறிக்கையில், தலைவர் – தமிழ் திரைப்பட தயாரிப்பாளர் சங்கம், ​பொது செயலாளர் – தென்னிந்திய நடிகர் சங்கம் ​என்றெல்லாம் குறிப்பிடப்பட்டிருந்தாலும், விஷால் கிருஷ்ணா என்ற தன்னுடைய லட்டர்ஹெட்டிலேயே அறிக்கை வெளியிடப்பட்டுள்ளது.

letter